ASILIMIA 72 ya wananchi wa mkoani Dodoma hawana vyoo bora huku asilimia 28 wakijisaidia katika vichaka na maeneo ya wazi.
Haki hiyo inaelezwa kusababisha uchafuzi mkubwa wa mazingira na
kuhatarisha usalama wa afya za wananchi katika wilaya zote mkoani hapa.
Ofisa Afya Mkoa wa Dodoma, Edward Ganja, amebainisha hayo mjini
hapa katika mafunzo kwa waandishi wa habari yaliondaliwa na Shirika la
Plan Internatinal.
Amesema utafiti uliofanywa na Wizara ya Afya na Ustawi wa Jamii
mapema mwaka huu mkoani Dodoma unaonyesha idadi kubwa ya wananchi
hususan vijijini wamejenga vyoo visivyo na ubora ambavyo ni hatari kwa
usalama wa afya.
“Ukiona mabanda ya vyoo ni yale yaliyojengwa kwa makuti bila
kupauliwa ambayo hujulikana kama ‘pasipotisaizi’ ambapo hakuna faragha
kwa kuwa mtu akiingia sehemu ya kichwa huonekana wazi,” amesema Ganja.
Ameeleza kuwa wilaya za Kongwa, Chamwino na Bahi zinaongoza kwa vifo
vingi vya watoto walio chini ya miaka mitano kutokana na kukosa vyoo
bora na kusababisha vinyesi kutapakaa sehemu za wazi, mashambani, kwenye
vyanzo vya maji na kwenye makazi ya watu na kusababisha milipuko ya
magonjwa.
“Kweli juhudi kubwa zinahitajika kuwahimiza wananchi kwani utafiti
unabainisha asilimia 27 tu za kaya zenye vyoo bora katika mkoa wa
Dodoma, hii ni hatari sana,” amesema Ganja.
Aidha, aliwataka wananchi kutunza mazingira kwa kujenga vyoo bora na kuachana na tabia ya kujisaidia sehemu za wazi.
Kwa mujibu wa Shirika la Plan Internatinal Watanzania watoto 36,500
wakiwemo watoto 18,500 wanapoteza maisha kutokana na kuharisha na
asilimia 90 kuugua kutokana na maji machafu, mazingira machafu na
kushindwa kunawa vizuri kabla na baada ya kutoka chooni.
Posts
