Mnamo Februari 26, Mercy Masambaga alijifungua mtoto wa kiume katika Hospitali ya Port Reitz. Siku iliyofuata, malaika huyo na baba yake Julius Kimeli walihamishwa hadi Hospitali Rufaa ya Coast General baada ya madaktari kugundua kuwa mtoto huyo alikuwa na uzito mdogo na alihitaji matibabu maalum. Lakini siku nne baadaye, walipewa mtoto mchanga wa kike mnamo Machi 1.
Waliposhinikiza kupata maelezo zaidi, waliarifiwa kuwa mtoto wao aliaga dunia mnamo Februari 27, na kwamba mwili wake ulikuwa umehifadhiwa katika chumba cha kuhifadhi maiti cha hospitali hiyo.
Masambaga alifichua kuwa aliletewa mtoto wa kike kwa sababu alitaka kunyonyesha lakini aliwaambia wauguzi kuwa mtoto wake alikuwa wa kiume na wala sio wa kike. "Waliniletea mtoto msichana nikawaambia mtoto wangu ni wa kiume," alisema Masambaga.
Mama huyo mwenye uchungu mkubwa alisema kuwa wauguzi hao waliingia chumbani kwa muda mfupi na kisha mmoja alirejea na kumwambia kwamba mtoto wake amefariki. "Walianza kusema mtoto wangu alifariki tarehe 27, nikawaambia tarehe 27 niliambiwa niende nikanunue pampers.
Itakuwaje wakaniambia we nenda ukae alafu wakakawia zaidi ya saa moja ndio wanasema alikufa?" alimaka mama huyo. Familia hiyo ilipiga ripoti kwa polisi na kwa sasa wanafuatilia kisa hicho ili kuhakikisha familia hiyo inapata haki kuhusiana na aliko mwanao.
Hata hivyo, Afisa Mkuu Mtendaji wa Hospitali Rufaa ya Coast General, Iqbal Khandwalla, amekanusha madai ya familia hiyo akidai kuwa anafahamu hali hiyo na kwamba sampuli za DNA zilichukuliwa Alhamisi, Machi 9, huku uchunguzi ukiendelea.
Chanzo:Tuko.co.ke
Posts
