Mwanamume
huyo alidaiwa kuwa alijichoma visu vitatu tumboni kwa nia ya kujiua
baada ya kushuku kuwa kipenzi chake kilikuwa kikigawa mapenzi nje ya
uhusiano wao.
Ilibidi
maafisa wa polisi waftyatue vitoa machozi ndani ya nyumba yake ili
wamzime kujiua huku majirani wakisaidia kuvunja mlango ili kumnusuru.
Kwa mujibu wa kamanda wa polisi wa Kangema Bw Juma Mashua, kisa hicho kilitokea usiku wa kuamkia jana katika eneo la Githiga.
“Mwanamume
huyo alirejea kutoka Jiji la Nairobi mwendo wa saa tatu usiku na akapata
bibi huyo ambaye ni mhudumu wa baa akiwa hajafika nyumbani. Alisubiri
kwa masaa kadhaa na akafahamu kuwa bibi hangerejea,” akasema.
Ilidaiwa kuwa mwanamume huyo alifululiza hadi katika baa ambayo bibi huyo alikuwa akihudumu na akapata kuwa hakuwepo pia.
“Alirejea nyumbani na akaomba hifadhi kwa jirani yake ambako alilala hadi asubuhi,” akasema Bw Mashua.
Mwendo wa saa kumi na moja asubuhi, bibi alijitokeza na ndipo jamaa akamfuata hadi ndani ya nyumba.
“Ubishi
ulizuka kati yao wawili na ndipo kwa hasira mwanamume huyo alifunga
mlango kutoka ndani na kisha akatwaa kisu cha kuchonga viazi na akaanza
kujidunga kwa tumbo akilia kuwa hangevumilia kushiriki mapenzi ya
uongo,” akasema afisa huyo.
Kuvunja mlango
Nduru za
mwanamke huyo ziliwaleta pamoja majirani ambao walipiga simu kwa maafisa
wa polisi na kwa bahati njema, kukawa nao walikuwa karibu na eneo hilo.
“Maafisa
waliwasili na walipochungulia kwa dirisha, wakapata mwanamume huyo
aking’ang’ana na bibi yake aliyekuwa akijaribu kumpokonya kisu hicho,”
akasema.
Ni katika
hali hiyo ambapo maafisa hao walirusha vitoa machozi ndani ya nyumba
hiyo ili kusambaratisha njama ya mwanamume huyo ya kuzidisha majeraha
yake huku majirani wakivunja mlango na kumtoa nje.
“Tulimkimbiza
hadi hospitali ya Kangema ambapo madaktari wanaendelea kuokoa maisha
yake huku nasi tukishika doria kando ya kitanda chake ili tu akipata
nafuu tumchukue na kumfikisha mahakamani kwa nia ya kutisha maisha ya
bibi yake na pia kujaribu kujiua,” akasema.
Aliongeza
kuwa hiyo ilikuwa mara yake ya pili ya kutekeleza uhalifu huo akitumia
kisu kwa kuwa ashawahi kufungwa jela kwa kudunga mpenzi wake mwingine wa
awali kwa madai ya kutoaminika katika ndoa.
Via swahilihub
Posts
