Wakenya watalazimika kuchimba mifuko yao zaidi kugharamia umeme huku ruzuku ya 15% ikitazamiwa kukamilika Disemba 31,2022.
Kampuni ya usambazaji wa umeme KPLC ilifichua kuwa ruzuku ya kupunguzwa kwa gharama ya umeme iliyoanzishwa na utawala uliopita, ilikuwa ya muda.
Hii ni baada ya Shirika la Fedha Duniani (IMF) kupendekeza serikali kufuta ruzuku hiyo kwani imeathiri vibaya uwiano wa ukwasi wa Kenya Power. "Ruzuku ya umeme ya 15% na michango mingine ya sekta inastahili kukamilika Disemba 31, 2022. Ilipaswa kutekelezwa kwa mwaka mmoja," alisema Mkurugenzi Mkuu wa KPLC Geoffrey Muli, kama alivyonukuliwa na Business Daily.
IMF lilikashifu ruzuku hiyo kwa kuweka hasara ya kila mwaka ya KSh 26.3 bilioni kwa Kenya Power. "Kupunguzwa kwa ushuru kutaisha mnamo Disemba 31, 2022, na ikitekelezwa, hali ya ukwasi ya KPLC itaimarika kwa kiwango kikubwa, hadi kufikia hatua ambapo msaada wa serikali ya Kenya hautahitajika tena," ilisema IMF. KPLC sasa inanuia kuongeza ushuru wa umeme kwa 12% kuanzia Januari 1, 2023, hatua ambayo itawashuhudia wateja wakigharamika zaidi kulipa umeme.
Gharama za umeme vilevile zinaweza kuongezeka zaidi kutokana na marekebisho ya mabadiliko ya ubadilishaji wa fedha za kigeni. Mkurugenzi mkuu wa Mamlaka ya Udhibiti wa Nishati na Petroli (EPRA) Daniel Kiptoo alisema bei zote za nishati ya umeme zitatokana na marekebisho ya mabadiliko ya ubadilishaji wa fedha za kigeni ya senti 148.29.
KPLC pia iliongeza bei za stima za mjazo baada ya EPRA kutangaza gharama mpya za juu za mafuta, na kuongeza gharama za mafuta kutoka KSh 4.63 hadi KSh 6.80 kwa kila uniti.
Posts
