Idara ya elimu sekondari wilaya ya Makete mkoani Njombe umeahidi kutatua changamoto zilizozua mvutano uliokuwepo kati ya wanafunzi wa kidato cha tano na sita wa shule ya sekondari Lupalilo na uongozi wa shule hiyo kufuatia hali iliyokuwa imejitokeza juzi majira na saa mbili usiku kwa wanafuzi hao kuandamana hadi ofisi za kijiji cha Tandala kushinikiza kutatuliwa matatizo yao.
Moja ya madai yao ilikuwa ni pamoja kuutaka uongozi wa shule hiyo kuwatenganisha vyumba vya kulala na wanafunzi wa vidato vya chini “O-Level” kutokana na changamoto kadhaa wanazozipata ikiwemo kuwapigia kelele na kulala watu wawili kitanda kimoja jambo ambalo hawalitaki.
Wakizungumza na mwandishi wetu kwa masharti ya kutopigwa picha, kurekodiwa wala kutajwa majina, wanafunzi hao wamesema wamekuwa wakitoa malalamiko mbalimbali kwa uongozi wa shule bila kuona hatua zozote zikichukuliwa, kabla ya juzi usiku kwenda kwa mkuu wa shule kudai madai yao hayo na wakaishia kuambiwa waondoke shuleni hapo
Akizungumzia suala hilo Afisa elimu sekondari wilaya ya Makete Jacob Meena amesema mara baada ya kuyasikiliza madai yao hatua stahiki zitachukuliwa ili kulimaliza tatizo hilo mapema iwezekanavyo.
Na ameyasema hayo hapo jana kabla ya kuingia kwenye kikao cha usuluhishi ambacho mwandishi wa eddy blog hakuruhusiwa kushiriki kwa sababu za kimaadili ya taratibu za shule hiyo
Mkuu wa shule ya Sekondari Lupalilo Bw.Johnes Liombo amesema wameyapokea madai hayo na kuahidi kuyafanyia kazi huku akiwasihi wanafunzi hao kufuata sheria na taratibu za shule.
Kwa upande wake diwani mstaafu wa kata ya Tandala Egnatio Mtawa ambaye wanafunzi hao walipoandamana juzi walihitaji kuzungumza naye na si mtu mwingine, akamweleza afisa elimu sekondari wilaya jinsi hali ilivyokuwa hapo juzi na hatua alizozichukua ikiwemo kuwarudisha shuleni kwa ajili ya kulala baada ya kuzungumza nao usiku huo, na kuongea na mkuu wa shule pamoja na afisa elimu sekondari kwa kuwapigia simu ili wakutane pamoja jana kutatua mgogoro huo
Naye mkuu wa kituo cha polisi Tandala Inspekta Majiruka amewataka wanafunzi kutulia na kutojiingiza katika vurugu zozote ikiwemo kuharibu mali za shule wakati taratibu za kuyatafutia ufumbuzi matatizo yao zikiwa zinaendelea.
Hadi tunachapisha habari hii, kilikuwa kikiendelea kikao cha kuumaliza mgogoro huo kilikuwa kinaendelea kikiongozwa na afisa elimu sekondari wilaya ya Makete ambapo haikuruhusiwa waandishi wa habari kushiriki
Posts
