Serikali imezindua taasisi ya upasuaji wa moyo,tiba na mafunzo ijulikanayo The Jakaya Kikwete Cardiac Institute , kwa lengo la kusaidia watanzania kupata matibabu ya moyo hapa nchini na kuwapunguzia gharama za kwenda nje kupata matibabu ya moyo.
Akizindua taasisi hiyo iliyopo katika hospitali ya taifa ya muhimbili jijini Dar es sslaam kwa niaba ya Rais Jakaya Kikwete, waziri wa afya na ustawi wa jamii Dk.Seif Rashid amesema taasisi hiyo itasaidia kwa kiasi kikubwa wananchi wengi zaidi wanaohitaji huduma za matibabu ya moyo ambao serikali ilikuwa ikiwagharamia fedha nyingi kwa kuwapeleka wagonjwa wachache kupata matibabu nje ya nchi, kuweza kupata matibabu hayo hapa nchini.
Dk. Rashid amesema taasisi hiyo itaendelea kutoa huduma za matibabu ya moyo kupitia kliniki mbalimbali kama vile ubadilishaji wa mishipa ya moyo ,moyo kupanuka,mishipa ya moyo kuziba,mapigo ya moyo kushuka,magonjwa ya moyo ya kuzaliwa na upasuaji wa moyo na mishipa ya damu , huku takwimu za mwezi uliopita zikionyesha jumla ya wagonjwa 14,252 walifika na kupatiwa huduma mbalimbali katika taasisi hiyo.
Husna George ni mama wa mtoto ambae amepata matibabu ya moyo, ameishukuru serikali kwa juhudi kubwa ya kuanzisha taasisi hiyo , kwani itasaidia watanzania kupata matibabu ya haraka .
Taasisi hiyo ilianza kutoa huduma za upasuaji wa moyo katika hospitali ya taifa ya Muhimbili mei 21 mwaka 2008 ambapo mpaka kufikia mwaka huu jumla ya wagonjwa 600 wamefanyiwa upasuaji wa moyo.
Posts
