Na Edwin Moshi, Makete.
Mkandarasi anayesambaza umeme katika vijiji mbalimbali vya wilaya ya Makete mkoani Njombe amelazimika kutoa maelezo ya kuridhisha ya ni lini atawasha umeme katika Kijiji cha Ihanga wilayani hapo
Akiwa kwenye ziara katika kijiji hicho Desemba 15,2022 Mbunge wa jimbo la Makete Festo Sanga amekutana na kero hiyo kwamba umeme tayari umefika katika kijiji hicho lakini mpaka sasa haujawashwa
Mbunge Sanga amelazimika kumpigia simu Mkandarasi huyo na kuweka sauti ya wazi (loud speaker) ili wananchi wasikie kwamba ni lini umeme utawashwa kwenye kijiji hicho kwani tayari transfoma zinapokea umeme lakini umeme bado haufiki kwa wananchi
"Nipo kwenye mkutano na wananchi hapa kijiji cha Ihanga na kero kubwa hapa wananchi wanataka kufahamu ni lini umeme utawaka, sasa nimekupigia simu nimeweka loud speaker uwaeleze wananchi ni lini umeme utawaka" amesema Mbunge
Mkandarasi huyo amesikika akisema ni kweli umeme umefika kijijini hapo na kuna mambo kidogo yaliyotakiwa kushughulikiwa ili umeme uwashwe hivyo Desemba 19,2022 atafika kuwasha umeme katika kijiji hicho
Mbunge Sanga amewaomba wananchi hao kuwa na subira kwani ndani ya siku nne hizo atamfuatilia mkandarasi huyo kuhakikisha ahadi yake ya kuwawashia wananchi wa Ihanga umeme inatekelezwa
Katika hatua nyingine akiwa katika kijiji cha Utweve amewataka wananchi hao kuanza ujenzi wa zahanati ya kijiji hicho na wakishaanza kwa kuanzia atatoa mifuko 50 ya saruji kuunga mkono jitihada za wananchi
Kwa sasa wananchi hao wanapata huduma za kiafya katika zahanati ya Ukwama na hospitali ya Ikonda hivyo amewataka kuona umuhimu wa kujenga zahanati ili huduma za kiafya wazipate kijijini hapo na muda wa kuanza ujenzi ndio sasa na yeye atawaunga mkono
"Mkishaanza kujenga nyie niambie nitatoa mifuko 50 ya Cement (saruji), sasa hivi siwezi kuitoa kwa sababu hamjaanza na itaganda, nyie jipangeni anzeni ujenzi, tutashirikiana mpaka ikamilike" amesema Mbunge Sanga
Mbunge huyo amefanya ziara katika vijiji vyote vya kata ya Ukwama lengo likiwa ni kusikiliza na kutatua kero za wananchi lakini pia na kuwapa mrejesho wa masuala mbalimbali waliyomtuma kuwasemea bungeni na serikalini
Posts
