Bw.Edward Ahazi Masevela (54) mkazi wa Kitula kata ya Kipagalo wilayani Makete amehukumiwa kifungo cha miaka 32 jela kwa makosa mawili tofauti baada ya mahakama kuridhika na ushahidi pasipo shaka kuwa alimbaka mwanafunzi wa darasa la tano jina linahifadhiwa wa shule ya msingi Mahulu ambapo imedaiwa alitenda kosa hilo kati ya mwezi Julai 2015 hadi Aprili 2016.
Kabla ya hukumu kutolewa hakimu aliyekuwa akisikiliza kesi hiyo ambaye ni Hakimu wa mkoa wa Njombe Bw.Cosmas Joseph Hemela alitoa nafasi ya kujitetea kwa mshtakiwa Bw.Edward Masevela ambapo katika utetezi wake ameomba mahakama imuone hana hatia kwani hakutenda kosa hilo lakini Mahakama imesema Mtuhumiwa badala ya kujitetea yeye mwenyewe amekuwa akitoa maneno ya kutuhumu ushahidi wa walalamikaji ambao ni watoto kwamba wamefundishwa.
Hakimu wa mkoa wa Njombe bw.Cosmas Hemela aliyekuwa akisikiliza kesi hiyo amesema mahakama imemkuta na hatia ya makosa mawili mtuhumiwa ambapo katika kosa la kwanza la ubakaji amehukumiwa miaka 30 jela na kosa la shambulio la aibu amehukumiwa miaka miwili jela na ameanza kutumikia adhabu zote mbili Julai mosi.
Hukumu hiyo kwa kosa la kwanza imetokana na kifungu cha 130 (1)(2)(e) na kifungu 131 (1)kama kilivyofanyiwa marekebisho mwaka 2002 amefungwa jela miaka 30, na kwa kosa la pili la shambulio la aibu linatoka kifungu 138 (1)(a) / (2)(b)kama ilivyofanyiwa marekebisho mwaka 2002 amefungwa miaka miwili.
Kesi hiyo kwa mara ya kwanza ilifunguliwa Mei 10, 2016 kwa makosa mawili, moja likiwa la ubakaji na la pili ni shambaulio la aibu pamoja na hukumu hiyo Rufaa ipo wazi na Bw.Masevela anaruhusiwa kukata rufaa ndani ya siku 30 kuanzia Julai mosi.
Posts
