Na Nathaniel Limu, Singida via moblog
Kijana
mkulima mkazi wa kijiji cha Mkenene kata ya Mugungira Wilaya ya Ikungi
mkoani Singida,Daud Melembeka (22)amehukumiwa na Mahakama ya Wilaya ya
Singida adhabu ya kutumikia jela miaka 30 baada ya kutiwa hatiani kwa
kosa la kunyang’anya pikipiki kwa kutumia silaha aina ya nondo.
Mapema
Mwendesha Mashitaka Sajenti wa Polisi,Godwel Lawrance alidai mbele ya
Hakimu Mfawidhi wa Mahakama ya Wilaya ya Singida,Flora Ndale,kuwa mnamo
novemba 14 mwaka jana huko maeneo ya karakana manispaa ya Singida,bila
halali mshitakiwa Daud alimnyang’anya Emmanuel Mussa pikipiki T.914 CCS
aina ya fekon,huku akijua wazi kuwa kitendo hicho ni kinyume cha sheria.
Mwendesha
Mashitaka huyo amesema kabla na baada ya kufanya unyang’anyi
huo,mshitakiwa Daud alimtisha na kumpiga mlalamikaji Emmanel kwa
nondo,ili kumwogofya aweze kutekeleza lengo lake hilo bila matatizo.
Amesema
siku ya tukio mshitakiwa alikodisha pikipiki hiyo na wakati wanaendelea
na safari,ghafla mshitakiwa alimwamuru dereva Emmanuel asimamishe
pikipiki na ndipo alipopata fursa ya kupora pikipiki hiyo.
Hata
hivyo,Lawrance amesema kesho yake novemba 15 mwaka jana saa nane mchana
mshitakiwa Daud aliweza kukamatwa na askari polisi E.81 D/CPL Masoye
akiwa Manyoni mjini na pikipiki aliyompora mlalamikaji Emmanuel.
Kabla
ya kutolewa kwa adhabu hiyo,Mwendesha Mashitaka Lawrance amesema
mshitakiwa Daud ni kijana mdogo mwenye nguvu za kutosha kumwezesha
kufanya kazi halali ambazo zinaweza kumpatia kipato cha kukidhi mahitaji
yake muhimu,lakini ameamua kutumia njia isiyo halali katika kujiingizia
mapato.
“Ili
iwe fundisho kwa mshitakiwa na iweze pia kuwaogofya watu wengine
wanaotarajia kufanya makosa ya unyang’anyi kwa kutumia silaha,naiomba
mahakama itoe adhabu kali kwa mshitakiwa”,amesema.
Akitoa
hukumu hiyo,hakimu Ndale amesema kuwa ushahidi uliotolewa na upande wa
mashitaka,umethibitisha bila kuacha chembe chembe ya shaka kuwa
mshitakiwa anayo hatia kama alivyoshitakiwa.
“Makosa
ya unyang’anyi wa kutumia silaha,sheria imetamka wazi kwamba adhabu
yake ni miaka 30 jela.Kwa hiyo utatumikia jela miaka 30 ili iwe fundisho
kwako na watu wengine wanaotarajia kufanya makosa ya unyang’anyi wa
kutumia silaha”,amesema hakimu Ndale.
Posts
