KESI ya madai ya masuala ya ndoa dhidi ya Mbunge wa Jimbo la Dimani,
Zanzibar Abdallah Sharia Ameir (CCM) iliyofunguliwa dhidi yake na
mlalamikaji Hawa Kundami inatarajiwa kuanza kusikilizwa Jumatatu ijayo.
Kwa mujibu wa hati ya kuitwa Mahakamani iliyotolewa na Msajili wa
Wilaya Februari 6, 2015, kesi hiyo inatarajiwa kusikilizwa Mahakama Kuu
mbele ya Jaji Aloycius Mujulizi.
Katika hati ya malalamiko iliyofunguliwa na Wakili wa mlalamikaji
Boka Melkisedeck anaiomba Mahakama isikilize kesi hiyo haraka kwa sababu
mlalamikaji hana makazi wala matunzo na mtoto wake mmoja ana matatizo
ya ulemavu wa akili na kwamba anahitaji matunzo na matibabu.
Mlalamikaji katika malalamiko yake yaliyowasilishwa na Wakili wake,
alieleza masuala mbalimbali ya familia kudhihirisha Mahakama kuwa
alikuwa mke halali wa Mlalamikiwa.
Maelezo yake yanaonesha kuwa wawili hao walianza kuishi pamoja mwaka
2002 baada ya ndoa iliyofungwa kwa imani za Kiislamu na kwamba nakala za
cheti cha ndoa anayo mlalamikiwa na hivyo kuitaka Mahakama kumtaka
aiwasilishe.
Vile vile alieleza kuwa mara baada ya ndoa yao, yeye na mlalamikiwa
waliishi maeneo mbalimbali na eneo la hivi karibuni ni katika nyumba yao
iliyopo Chamanzi, Dar es Salaam na ambayo ni kati ya vitu vilivyo chini
ya mamlaka ya Mahakama.
Alieleza pia wakati wa maisha yao ya ndoa walijaliwa kupata watoto
watatu ambao ni Shadya Sharia (8), Nadya Abdallah Sharia (6) na Abas
Abdalla na kwamba waliishi maisha ya furaha hadi mlalamikaji
alipojifungua mtoto Abas ambaye ana ulemavu wa akili.
Katika malalamiko yake pia Hawa alibainisha kuwa wakati wa ndoa yao
kwa pamoja walichuma baadhi ya mali kama zilizoambatanishwa kwenye moja
ya kiambatanisho kama sehemu ya nyaraka katika malalamiko
yaliyofunguliwa.
Kutokana na maelezo yake na mengine yaliyopo katika hati ya madai,
mlalamikaji anaiomba Mahakama kutoa uamuzi kuwa ndoa kati ya mlalamikaji
na mlalamikiwa ivunjwe na mlalamikaji apewe talaka.
Ameomba pia Mahakama kutoa amri ya kugawana sawa kwa sawa mali walizochuma pamoja wakiwa katika ndoa.
Mahakama iamuru mlalamikiwa kutoa fedha za matunzo kwa watoto kiasi
cha Sh milioni 2 kila mwezi tangu siku malalamiko haya yalipofunguliwa
Januari 26,mwaka huu hadi siku ya hukumu, mlalamikaji apewe haki ya
kukaa na watoto, kulipia gharama za kesi na gharama zingine zozote
ambazo Mahakama itaamuru kulipiwa.
Posts
