NA KENETH NGELESI,MBEYA
CHAMA cha ushirika na masoko cha Luhanga Amcos, kimesema kinakusudia kuiburuza mahakamani serikali ya Mkoa wa Mbeya, kutokana na kubatilisha matumizi ya ardhi ya hekta 5000 zilizokuwa zikimilikiwa kihalali na chama hicho na kuzirejesha kwa wananchi.
Sababu za kuipeleka serikali mahakamani ni kurejeshewa ardhi yao lakini pia kurudishiwa gharama zote walizotumia katika kuliendeleza shamba hilo ambapo mpaka sasa wametumia kiasi cha shilingi Bilionmi 1.1
Mwenyekiti wa Luhanga Amcos, Merkioni Bagule akizungumza na waandishi wa habari ofisini kwake jana, alisema chama hicho kinatarajia kuliwasilisha suala hilo mahakamani ili litatuliwe kisheria.
Alisema, Chama hicho kilifuata taratibu zote za kisheria za umilikaji wa hekta 5000 za ardhi ya kijiji cha Luhanga, na kwamba kwa mujibu wa utaratibu wa chama hicho hekta hizo zilikuwa zimetengwa kwa ajili ya kugawanywa kwa wanachama wapatao 320.
“Tunashangazwa na uamuzi wa serikali wa kutupokonya ardhi ambayo tunaimiliki kihalali, umilikaji ulifuata taratibu zote kuanzia ngazi ya kijiji, kata na wilaya, na masharti yote tuliyokuwa tumepewa na kijiji ya kuyafanya tumeyatekeleza hasa yale ya kijamii,”alisema.
Aidha, mwenyekiti huyo, alimtupia lawama Mkuu wa Mkoa wa Mbeya, Amosi Makalla, kwa kufanya maamuzi pasipo shirikisha upande wa pili na kusisistiza kwamba maamuzi hayo ni batili.
“Tumesikia katika kwa vyomba vya habari, Mkuu wa mkoa akiwahutubia wananchi wa Kata ya Luhanga katika mkutano, ambapo aliwatangazia wananchi kwamba serikali imezirejesha hekta hizo za ardhi mikononi mwao , huku akisisitiza kwamba kikundi kilifoji mitasari ya kikao jambo ambalo halina ukweli,”alisema.
Alihoji, kama nyaraka zilifojiwa kwanini, serikali haikukiandikia kikundi hicho barua kwa uthibitisho , pia kwa nini serikali imetoa maamuzi kwa kusikiliza upande mmoja jambo ambalo inatambua kuwa ni kinyume cha sheria.
Alisema, chama hicho hakijaridhishwa na uamuzi huo hivyo wamekudusia kuiburuta Serikali mahakamani huku akieleza kuwa Mkuu huyo wa Mkoa amedangwa na watendaji wake akiwamo Mkuu wa Wilaya ya Mbarali Gulam Hussen Kifu ambaye anatajwa kuwa na maslai binafsi na ardhi hiyo.
‘Napenda nisema ukweli Mkuu wa Mkoa amedanganywa na watendaji wake hasa DC, Kifu ambaye tangu aje Mbarali kumekuwa na migogoro kila siku mimi pamoja na wanachama wenzangu tungemuomba , Mkuu wa Mkoa angesikiliza pande zote mbili ndipo achukue uamuzi ’ alisemaAlly Kombamjumbe.
Alisema shamba hilo walipewa tangu mwaka 2004 na kwamba wao kama wawekezaji wa ndani walishaanza ujenzi wa mihundombinu mbalimbali ikiwemo mifereji ya maji na kufuatilia vibali vya maji kwenye mamlaka zinazo simamia matumizi ya maji kupitia kilimo cha umwagiliaji.
Akizungumzia, suala la wao kutuhumiwa kushindwa kutekeleza ahadi walizozitoa kwa wananchi wa kijiji hicho, mjumbe huyo alikanusha madai hayo, na kusema kijiji kiliomba kujengewa Zahanati, ofisi ya kijiji na kuingiziwa maji jambo ambalo walilitekeleza.
“Chama kimechangia fedha katika kukamilisha ujenzi wa Zahanati ya Kijiji, chama hicho pia kimejenga jingo la ofisi ya kijiji ambayo pia ndio iliyotumiwa na Mkuu huyo wa Mkoa, kununua thamani za ndani pamoja na kukiingizia kijiji kiasi cha shilingi milioni 21 kwa ajili ya uingizwaji wa maji,”alisema.
Aliongeza kuwa, wao kama wanakikundi wanatambua kuwa uamuzi huo umeghubikwa na vitendo vya rushwa, huku akileza kuwa ni vema viongozi hao wakatambua kuwa Rais aliwateua ili waje kutatua kero za watu na si kunyanyasa na kuonea watu.
Alisema, chama hicho kinaushahidi wa kutosha, unaomuhusisha, Mkuu huyo wa wa wilaya kushiriki vitendo vya kikatili na vya kinyama, kwani inasemekana kwamba kiongozi huyo aliwaamuru wafugaji wa ng’ombe kuingiza shambani mifugo yao na kuteketeza mazoa yaliyolimwa na wakulima zaidi ya hekta 70.
Hata hivyo, mjumbe huyo alitoa ufafanuzi wa hekta hizo 5000 walizokuwa wamezitenga ni kwamba zililenga kugawanywa kwa wanachama wa ushirika huo wapatao 320 ambapo kila mmoja angeweza kupata hekta 20 ili kikidhi matakwa ya kisheria yaliyoelekezwa katika sheria namba 5 ya ardhi ya mwaka 1999.
Posts
